𑢽𑢨𑢥𑢡𑢠 𑢴𑢩𑢼𑢨𑢥𑢡

𑢹𑣉𑣉 𑢹𑣃𑣔𑣁 𑢼𑣈𑣅𑣄 𑢽𑣈𑣅𑣁𑣀 𑢴𑣉𑣜𑣈𑣅𑣁 𑢬𑣉𑣚 𑣙𑣉𑣉 𑣙𑣃𑣔𑣁 𑣞𑣃𑣖𑣀 𑣜𑣈𑣋𑣈 𑣈𑣓𑣌𑣁𑣓 𑣝𑣈𑣅𑣁𑣀 𑣖𑣈𑣓𑣄, 𑣉𑣌𑣉𑣓𑣁 𑣏𑣂 𑣔𑣂𑣝𑣃𑣖 𑣜𑣈𑣅𑣄 𑣙𑣃𑣔𑣁𑣌𑣉 𑣜𑣈 𑣈𑣓𑣌𑣁𑣓 𑣝𑣈𑣅𑣁𑣀 𑣗𑣓𑣉𑣄𑣁. 𑢯𑣂𑣚𑣌𑣁 𑣏𑣀? 𑢬𑣉𑣚 𑣙𑣉𑣉 𑣙𑣃𑣔𑣁 𑣜𑣈𑣋𑣈 𑣝𑣈𑣅𑣁𑣀 𑣋𑣖𑣁𑣅 𑣜𑣂𑣖𑣂𑣚 𑣓𑣃𑣊-𑣓𑣃𑣊 𑣌𑣉𑣿𑣁𑣞𑣂 𑣓𑣃𑣗𑣄 𑣘𑣃𑣌𑣑 𑣚𑣈𑣌𑣁 𑣉𑣒𑣀 𑣓𑣂𑣕𑣂𑣜 𑣗𑣁’𑣓 𑣕𑣓𑣁. 𑢶𑣈𑣓𑣔𑣉 𑣇𑣜𑣃𑣖 𑣜𑣈𑣅𑣄 𑣈𑣕𑣉 𑣝𑣈𑣅𑣁𑣀 𑣞𑣗𑣂𑣓𑣌𑣉 𑣕𑣙𑣄 𑣜𑣈 𑣗𑣓𑣉𑣄. 𑢵𑣃𑣜𑣉𑣄 𑣏𑣓𑣗 𑣝𑣂𑣊𑣋𑣂 𑣁𑣞𑣃𑣜𑣉𑣄 𑣚𑣈𑣌𑣁 𑣙𑣃𑣔𑣁 𑣖𑣃𑣏𑣁𑣑𑣉𑣄 𑣜𑣈 𑢥 𑣉𑣀𑣑𑣉𑣄 𑣋𑣈 𑣞𑣋𑣈𑣓𑣉𑣄 𑣙𑣜𑣁-𑣖𑣜𑣀 𑣔𑣜𑣃 𑣇𑣜𑣁𑣁𑣓𑣁. 𑢯𑣂𑣕𑣂 𑣚𑣂𑣘𑣂 𑣜𑣈𑣅𑣄 𑣖𑣃𑣏𑣑 𑣁𑣑 𑣕𑣃𑣑𑣉𑣄 𑣜𑣈𑣅𑣄𑣌𑣉 𑣅𑣕𑣈 𑣁𑣏𑣃𑣜-𑣁𑣑𑣏𑣂𑣊 𑣇𑣜𑣁𑣓𑣁. 𑢹𑣉𑣉 𑣖𑣁𑣓𑣖𑣂𑣌𑣉 𑣜𑣈 𑣋𑣈 𑣓𑣈𑣓 𑣖𑣉𑣅𑣉𑣑 𑣖𑣃𑣕𑣂 𑣎𑣀 𑣈𑣙𑣕𑣈 𑣋𑣉𑣒𑣁 𑢵 𑣔𑣞𑣃𑣖 𑣝𑣂𑣍𑣙𑣗𑣊𑣋𑣁’𑣄 𑣌𑣃𑣜𑣞𑣂𑣓𑣖𑣁 𑣖𑣁𑣓𑣖𑣂 𑣎𑣉𑣊 𑣜𑣈𑣅𑣄 𑣌𑣕𑣙𑣁𑣌𑣉 𑣎𑣋𑣁𑣜𑣈𑣅𑣁, 𑣓𑣈𑣓𑣁 𑣘𑣃𑣕𑣂 𑣜𑣈 𑣉𑣚 𑣁𑣀𑣌𑣁 𑣁𑣌𑣓 𑣚𑣈𑣌𑣁 𑣖𑣉𑣚𑣊 𑣜𑣈𑣌𑣉 𑣞𑣆𑣕𑣂𑣗𑣁 𑣕𑣄. 𑢮𑣃𑣔𑣂 𑣌𑣉𑣚 𑣙𑣉𑣉𑣌𑣉𑣁𑣄 𑣞𑣓𑣁𑣋𑣉𑣖 𑣌𑣎𑣂 𑣎𑣃𑣇𑣋-𑣎𑣃𑣇𑣋 𑣕𑣆𑣓, 𑣘𑣃𑣕𑣂𑣌𑣉 𑣜𑣈 𑣁𑣀𑣌𑣁 𑣕𑣆𑣓 𑣏𑣂𑣖𑣂𑣓 𑣙𑣉𑣓𑣀 𑣏𑣈𑣕𑣓 𑣏𑣃𑣒𑣂𑣄 𑣜𑣈𑣗𑣃. 𑢬𑣉𑣚 𑣙𑣉𑣉𑣌𑣉𑣁𑣄 𑣜𑣈𑣊𑣋𑣁, 𑣗𑣂𑣜𑣍𑣎𑣂 𑣙𑣞𑣃-𑣔𑣃𑣌𑣃, 𑣁𑣜 𑣁𑣓𑣁𑣞𑣃𑣚 𑣙𑣉𑣜𑣁 𑣏𑣃𑣆𑣚𑣁𑣉 𑣌𑣁 𑣙𑣉𑣗𑣁𑣓𑣁, 𑣁𑣛𑣂𑣄-𑣗𑣛𑣂𑣄 𑣓𑣖-𑣌𑣜𑣏𑣁, 𑣌𑣃𑣜𑣃𑣖𑣃𑣒𑣃 𑣏𑣂𑣓𑣄𑣏𑣂 𑣞𑣗𑣂𑣓 𑣝𑣈𑣅𑣁𑣀 𑣘𑣂𑣒𑣂𑣌𑣁 𑣚𑣉𑣉𑣄 𑣕𑣈 𑣞𑣋𑣆 𑣅𑣌𑣁𑣓𑣁. 𑢾𑣓𑣀 𑣖𑣉𑣚𑣊 𑣜𑣈 𑣁𑣜𑣞𑣂 𑣚𑣈𑣌𑣁 𑣞𑣖𑣓𑣀 𑣌𑣈𑣙 𑣜𑣈𑣋𑣈 𑣞𑣗𑣂𑣓 𑣔𑣓𑣀 𑣜𑣈𑣅𑣄 𑣞𑣓𑣀 𑣘𑣃𑣜𑣁𑣓𑣁. 𑢧𑣛𑣃𑣄 𑣚𑣈𑣌𑣁𑣙𑣗𑣂𑣓 𑣞𑣜𑣂 𑣏𑣂 𑣏𑣌𑣑? 𑢴𑣓𑣀 𑣜𑣈𑣅𑣄 𑣞𑣓𑣀 𑣘𑣃𑣜𑣁𑣓 𑣕𑣓𑣁 𑣈𑣓𑣕𑣈 𑣕𑣉𑣜𑣀 𑣞𑣖𑣓𑣀 𑣜𑣈𑣅𑣄 𑣞𑣓𑣀 𑣏𑣂𑣌𑣁 𑣌𑣁 𑣘𑣃𑣜𑣁𑣓𑣁? 𑢸𑣃𑣜𑣁𑣓 𑣋𑣈𑣅𑣁 𑣙𑣂𑣅𑣁𑣕𑣂𑣊 𑣏𑣌𑣁𑣕𑣂𑣊 𑣖𑣉𑣚𑣊 𑣙𑣁𑣕𑣀 𑣌𑣁𑣒𑣁 𑣕𑣂𑣙 𑣕𑣈 𑣘𑣆𑣒𑣂 𑣚𑣋𑣁𑣕𑣂𑣊𑣁. 𑢷𑣉𑣜𑣉 𑣋𑣂𑣅𑣃𑣄 𑣘𑣈𑣈𑣀𑣔 𑣌𑣃𑣜𑣌𑣃𑣜 𑣜𑣌𑣂𑣊 𑣜𑣁-𑣈𑣛𑣄 𑣕𑣙𑣗𑣈𑣓. 𑢹𑣃𑣔𑣁 𑣜𑣈𑣅𑣄 𑣁𑣓𑣁𑣞𑣃𑣚 𑣙𑣉𑣜𑣁 𑢹𑣃𑣔𑣁 𑣜𑣈𑣅𑣄 𑣁𑣓𑣁𑣞𑣃𑣚 𑣙𑣉𑣜𑣁 𑣏𑣂𑣚𑣌𑣁 𑣏𑣀𑣗𑣃 𑣗𑣆𑣂𑣅𑣁 𑣏𑣂 𑣙𑣃𑣔𑣁 𑣜𑣂𑣚𑣁-𑣖𑣁𑣚𑣁 𑣞𑣘𑣁𑣁𑣓 𑣋𑣈 𑣞𑣉𑣅𑣕𑣁 𑣞𑣃𑣓𑣔𑣉𑣜 𑣓𑣈𑣚𑣉𑣄. 𑢳𑣈𑣓𑣁 𑣞𑣗𑣂𑣓 𑣜𑣈𑣅𑣄 𑣎𑣀𑣙 𑣗𑣂𑣕𑣂 𑣁𑣔𑣉 𑣙𑣅𑣁𑣖 𑣕𑣓𑣁. 𑢹𑣅𑣁𑣖 𑣜𑣈𑣅𑣄 𑣝𑣈𑣅𑣁𑣀 𑣗𑣈𑣋𑣜 𑣙𑣃𑣔𑣁 𑣌𑣁 𑣖𑣜𑣝𑣁𑣚𑣉𑣄𑣁. 𑢨𑣓𑣁 𑣓𑣀 𑣉𑣛𑣄-𑣉𑣛𑣄 𑣔𑣃𑣁𑣜-𑣔𑣃𑣁𑣜 𑣜𑣈𑣋𑣈 𑣈𑣒𑣈𑣄 𑣙𑣃𑣔𑣁 𑣜𑣈𑣓𑣌𑣉 𑣚𑣈𑣌𑣁 𑣚𑣂𑣘𑣂 𑣏𑣂𑣕𑣂 𑣗𑣈𑣒𑣁𑣓 𑣕𑣉𑣗𑣈 𑣙𑣉𑣗𑣁 𑣔𑣛𑣂𑣅𑣁𑣄. 𑢹𑣃𑣔𑣁 𑣜𑣈𑣅𑣄 𑣜𑣆𑣎-𑣜𑣆𑣕 𑢧𑣛𑣃𑣄 𑣚𑣈𑣈𑣜𑣈 𑣌𑣉𑣚 𑣙𑣉𑣉 𑣙𑣃𑣔𑣁 𑣜𑣈𑣅𑣄 𑣜𑣆𑣎-𑣜𑣆𑣕 𑣉𑣔𑣉𑣚-𑣗𑣉𑣔𑣉𑣚 𑣕𑣈 𑣙𑣂𑣜𑣂𑣄-𑣘𑣂𑣜𑣂𑣄 𑣏𑣗𑣁 𑣕𑣓𑣁. 𑢴𑣂𑣌𑣃 𑣎𑣜𑣂 𑣌𑣗𑣃𑣁𑣄 𑣖𑣈𑣓𑣕𑣈 𑣖𑣈𑣓-𑣖𑣈𑣓 𑣕𑣈 𑣜𑣈𑣄𑣗𑣃 𑣏𑣌𑣁𑣑𑣉𑣄 𑣕𑣓𑣁. 𑢡𑣗𑣃𑣁𑣄 𑣜𑣆𑣎-𑣔𑣂𑣆𑣕 𑣔𑣉𑣝𑣕𑣃𑣜 𑣝𑣁𑣞𑣉𑣓𑣗𑣃 𑣜𑣂𑣂𑣊 𑣌𑣈𑣑𑣁. 𑢡𑣜 𑣁𑣇𑣜𑣂 𑣜𑣂𑣊𑣋𑣁 𑣚𑣉𑣉𑣄 𑣋𑣈 𑣔𑣂𑣌𑣃 𑣝𑣁𑣞𑣓 𑣕𑣈𑣌𑣉 𑣚𑣔𑣂 𑣔𑣚-𑣔𑣘𑣚 𑣕𑣑𑣗𑣃. 𑢮𑣃𑣀𑣗𑣁𑣙 𑣜𑣈𑣗𑣃 𑣁𑣒𑣃-𑣘𑣒𑣃𑣓 𑣕𑣓𑣁. 𑢧𑣛𑣂 𑣗𑣈𑣒𑣁 𑣞𑣈𑣌𑣁𑣁𑣌𑣓𑣁 𑣏𑣃𑣆𑣚𑣁𑣉 𑣌𑣗𑣃 𑣜𑣂𑣂𑣊𑣈𑣅𑣁 𑣏𑣂 𑣁𑣗𑣃𑣁𑣄 𑣝𑣁𑣞𑣉𑣓-𑣔𑣂𑣆𑣕 𑣁𑣔𑣉 𑣗𑣓𑣉𑣄 . 𑢳𑣈𑣓 𑣝𑣁𑣞𑣉𑣓 𑣔𑣂𑣇𑣕𑣌𑣉𑣔𑣉 𑣝𑣂𑣜𑣎𑣉𑣓 𑣚𑣉𑣉𑣄 𑣋𑣈𑣗𑣃 𑣁𑣋𑣃 𑣕𑣑𑣁. 𑢡𑣗𑣂𑣓𑣄 𑣞𑣗𑣂𑣓 𑣇𑣛𑣃𑣄 𑣘𑣃𑣜𑣁𑣓𑣁. 𑢹𑣅𑣁𑣖𑣄 𑣙𑣅𑣁 𑣕𑣈 𑣁𑣗𑣂𑣓𑣄 𑣙𑣉𑣖𑣉𑣙 𑣜𑣈𑣅𑣄 𑣙𑣅𑣁𑣔𑣉 𑣘𑣃𑣜𑣁𑣓𑣁, 𑣇𑣛𑣂𑣄 𑣕𑣙𑣗𑣂𑣓 𑣎𑣉𑣜𑣊-𑣎𑣉𑣜𑣊. 𑢹𑣅𑣁𑣖 𑣜𑣈𑣅𑣄 𑣝𑣈𑣅𑣁𑣀 𑣒𑣃𑣊𑣌𑣂 𑣙𑣒𑣄 𑣕𑣈 𑣞𑣉𑣊𑣈 𑣜𑣈𑢥 𑣖𑣉𑣚𑣊 𑣙𑣕𑣀 𑣜𑣈𑣅𑣄 𑣌𑣁 𑣏𑣗𑣁𑣉𑣄𑣁. 𑢯𑣗𑣁𑣉𑣄 𑣕𑣈𑣅𑣄 𑣜𑣈𑣏𑣁 𑣏𑣗𑣁𑣉𑣄𑣁. 𑢡𑣚𑣉𑣗𑣂𑣓 𑣇𑣛𑣃𑣄 𑣅𑣁, 𑣜𑣈𑣄 𑣏𑣗𑣁𑢭𑣁𑣌𑣉 𑣝𑣈𑣅𑣁𑣀, 𑢾𑣊 𑣙𑣒𑣂𑣊𑣈𑣗𑣂𑣓 𑣇𑣔𑣁𑣜 𑣜𑣂𑣂𑣀𑣌𑣉 𑣕𑣈 𑢸𑣂𑣓𑣕𑣂𑣜𑣈𑢶 𑣙𑣅𑣁𑣖 𑣝𑣈𑣅𑣁𑣀 𑣔𑣂𑣝𑣃𑣖 𑣌𑣉𑣏𑣁-𑣌𑣉𑣏𑣁 𑢡𑣚𑣉𑣗𑣂𑣓 𑣘𑣉𑣏𑣁𑣅𑣁 𑣈𑣛𑣄 𑣅𑣁 𑣙𑣒𑣂𑣊 𑣗𑣁𑣜𑣁 𑣕𑣓 𑣜𑣈 𑢺𑣉𑣞𑣉𑣑 𑣎𑣉𑣗𑣈 𑣌𑣏𑣜𑣁𑣌𑣉 𑣜𑣈 𑢹𑣂𑣅𑣁𑣕𑣂𑣊 𑣋𑣈 𑣞𑣓𑣀𑣗𑣂𑣓. 𑢬𑣃𑣏𑣁 𑣁𑣌𑣓𑣌𑣉 𑢧𑣒𑣁𑣌𑣉𑣗𑣂𑣓. 𑢹𑣅𑣁𑣖 𑣝𑣈𑣅𑣁𑣀 𑣞𑣉𑣁𑣓 𑣕𑣈 𑢬𑣁 𑣖𑣓𑣁𑣕𑣂𑣊 𑣌𑣁 𑣙𑣜𑣁𑣕𑣂𑣊 𑢷𑣑𑣈𑣖 𑣇𑣒𑣁𑣆 𑣚𑣁𑣀𑣑𑣂𑣅𑣁 𑣋𑣃𑣀𑣑𑣂 𑢯𑣂𑣖𑣂𑣓 𑣁𑣍𑣎𑣁𑣙 𑣓𑣂𑣕𑣂𑣜 𑣙𑣅𑣁𑣖 𑣝𑣈𑣅𑣁𑣀 𑣆𑣖𑣂𑣓 𑣁𑣍𑣎𑣙 𑣗𑣈𑣜𑣈𑣑𑣈𑣓 𑣌𑣉𑣚𑣙𑣁𑣓 𑣔𑣂𑣝𑣃𑣖. 𑢡𑣗𑣃 𑣓𑣈𑣓 𑣔𑣂𑣝𑣃𑣖 𑣜𑣈 𑣉𑣌𑣉𑣓𑣌𑣉 𑣔𑣉𑣜𑣉𑣖 𑣔𑣉𑣝𑣕𑣃𑣜 𑣜𑣈𑣅𑣄 𑣘𑣈𑣈𑣄 𑣜𑣘𑣃𑣑 𑣁𑣜 𑣗𑣂𑣝𑣁𑣞 𑣏𑣗𑣁 𑣅𑣓𑣁 𑣆𑣖𑣂𑣓 𑣁𑣍𑣎𑣙 𑣙𑣃𑣔𑣁 𑣜𑣘𑣃𑣑𑣈𑣓 𑣕𑣈𑣅𑣄 𑣆𑣊𑣋𑣃𑣚 𑣇𑣔𑣃𑣗𑣈𑣓𑣁. 𑢧𑣛𑣃𑣄 𑣚𑣈𑣌𑣁𑣙𑣗𑣂𑣓 𑣇𑣛𑣃𑣄 𑣜𑣈 𑣋𑣈 𑣖𑣈𑣓𑣄 𑣚𑣂𑣍𑣁 𑣎𑣂𑣗𑣉𑣓 𑣕𑣈 𑣋𑣈 𑣙𑣚𑣈 𑣗𑣚𑣈 𑣅𑣌𑣁𑣓𑣁. 𑢾𑣗𑣂𑣓 𑣖𑣂𑣑 𑣖𑣉𑣉𑣕 𑣖𑣂𑣑 𑣇𑣛𑣃𑣄 𑣕𑣈 𑣘𑣆𑣒𑣂𑣗𑣃 𑣜𑣂𑣌𑣁𑣅 𑣙𑣉𑣓𑣀 𑣇𑣛𑣂𑣄 𑣁𑣗𑣃𑣁𑣄 𑣁𑣊𑣎𑣙 𑣘𑣃𑣜𑣁𑣓𑣁. 𑢺𑣁𑣀𑣑𑣂𑣅𑣁𑣌𑣉𑣗𑣃 𑣌𑣗𑣃 𑣚𑣁𑣀𑣑𑣂𑣅𑣁𑣉𑣄 𑣏𑣁 𑣇𑣞𑣃𑣜-𑣌𑣈𑣞𑣃𑣜𑣌𑣉𑣗𑣃 𑣚𑣞𑣃𑣜 𑣌𑣈𑣈𑣑 𑣜𑣂𑣚𑣁-𑣖𑣁𑣚𑣁 𑣕𑣜𑣚 𑣉𑣌𑣉𑣗, 𑣘𑣃𑣀𑣑𑣂 𑣓𑣂𑣂𑣚 𑣋𑣔𑣈𑣑 𑣁𑣜𑣄, 𑣎𑣈𑣊𑣋𑣁 𑣎𑣀𑣋𑣂, 𑣗𑣈𑣊𑣋𑣁 𑣗𑣀𑣋𑣂 𑣔𑣂𑣝𑣃𑣖𑣗𑣃 𑣗𑣆𑣂. 𑢷𑣃𑣔𑣚𑣁𑣚 𑢡𑣀𑣋𑣁𑣜𑣂𑣅𑣁 𑢹𑣁𑣕𑣃 – 𑢹𑣂𑣎𑣂𑣅𑣁.